2 Ka Tinun-an sa usa ka Maritime School nga gituhuang tigpayuhot sa Ginadiling Drugas

0
5

2 Ka Tinun-an sa usa ka Maritime School nga gituhuang tigpayuhot sa Ginadiling Drugas, Nasikop sa Buybust Operation Kaganihang kadlawon 10/22/19,… 340,000 pesos nga kantidad sa Shabu, Nasakmit sa Utoridad.

Mipahigayun sa Buybust Operation sa mga alas 12:15 kaganihang kadlawon , ang Tinugyanan sa Tagbilaran City Police Drugs Enforcement Unit pinangulohan sa Hepe niini nga si PLt./Col. Oscar Boyles diin ang Operasyon Gihimo Didto sa usa ka balay paabangan nga nahimutang sa M. Parras St. , Pob. 2 ning dakbayan.

Ang mga suspek gipaila nga mao si RAMIL TAMSI y’ TORRENTERA, 26 anyos , usa ka 3rd year college nga Maritime Student , ug kasamtangan nga gapuyo sa usa ka balay paabangan sa maong dapit ug lumad nga taga Sitio Aton, Brgy. Calatrava, Lungsod sa Carmen, ug ang iyang kauban nga sila si BERNARD MEHOGNE y’ LOPEZ, 27 anyos, 2nd year College nga Maritime Student nga taga Sitio Tinokod, Brgy. Mantalongon, Lungsod sa Sagbayan, Bohol.

Napalitan ang mga suspek ug 1 ka sachet sa gituhuang shabu sa kantidad nga 500 pesos , ug atol sa maong operasyon , nakuhaan ang mga gikathapan ug laing 3 ka gagmay nga sachet sa gidudahang shabu, ug 1 ka dakong potos sa illegal nga drugas, lakip ang mga gamit sa pagsuyop ug gamit sa pagputos ug shabu.

Gibana-bana nga mutimbang ngadto sa 50 gramos ang naasoy nga illegal nga drugas, ug may street value kining muabot ngadto sa 340,000 pesos.

Kasamtangan nga Gibilango karon ang mga suspetsado sa karsel sa City PNP ug giandam na ang kaso nga ipasaka batok kanila.